Andreas Holdener-Beeler «Furggälä-Älpler»

NEKROLOGE

Üsä Dädi Andreas Holdener isch am 21.Juli 1934 als zweits Chind vo dä Marie und äm Baptist Holdener-Nauer im Tschalun usä im Oberybrig uf dWält cho. Är hed sini Chindheit mit zwei Gschwüsterti verbrungä, am älterä Brüäder Baptist und dä jüngerä Schwöster Maria.

Scho mit vier jährig hed är dä Summer mit sim Vater uf dä Chäsärä verbrungä zum «geisslerä». Drum hends am Dädi «z’Geisslers Res» gseid.

Später hed är 7 Jahr halbtags d’Schuäl im Oberybrig bsuecht. Vo 1946−1956 hed d’Familiä dä Summer uf dr Alp Suurbrunnä verbrungä. Duä hed är halt vo det us i d’Schuäl müässä, am liäbstä barfuäss.

D’Natur isch am Dädi scho vo Chindsbeinä a sehr wichtig gsi. Im Winter isch är gärä uf d’Schi und im Summer isch d’Alp si Mittelpunkt gsi. Au isch är immer gärä zum Unkel Josef gangä zum hälfä heuä, drum isch d’Schuäl mängisch chle z’churz cho. Är heds nid so wichtig gfundä und isch ihrä einisch mehreri Täg färn blibä. So isch äs däzuä cho, dass sie ihn vo dr Alp hend müässä abholä.

Nach dr Schuäl hed dä Dädi bi dr Oberallmig als Holzer und a verschiednigä Ortä als Hilfschnächt gschaffet.

Im Summer 1954 isch sin älter Brüäder Baptist bi dä Arbet tödlich verunglückt.

Mit 20gi isch dä Dädi i d’Rekrutäschuäl als Train-Soldat uf Thun izogä wordä. Da s’Gäld knapp gsi isch, hed är i denä 17 Wuchä nur ei Urlaub Dihei verbrungä.

Im Jahr 1956 hed dä Dädi sin erst Summer uf dä Furggälä als Älpler verbrungä. Ihm sind 41 schöni aber au arbetsriichi Summer gfolgt. Im Herbst hed är sis Gäld mit Holzä oder i dä «Sagi» und über dWintersziit uf äm Buu s’Züri verdient. Ab 1979 bis zur Pensioniärig isch är über dä Winter bi dä Firma Lüönd im Unterybrig agstellt gsi.

Üsä Dädi isch ä fröhlichä und gselligä Jungspund gsi und hed i sinärä Frizit gärä s’Tanzbei gschwungä.

So isch äs cho, dass är 1969 a dä Fasnacht im Unterybrig sini zuäkünftig Frau, Elisabeth Beeler, kännä glernt hed. Dä Dädi und s’Mami sind am 29.Mai 1971 i dä Chilä im Oberybrig vor dä Traualtar gstandä und hend vo det ä wäg d’Summer gmeinsam uf dä Alp verbrungä.

Us dä Ehe sind drü Chind hervor cho, 1973 Elisabeth, 1975 Andreas und 1980 Markus.

Au miär Chind hend dä Summer uf dä Alp verbrungä. Im Herbst hemmer alli zämä Usflüg i d’Natur gmacht oder sind zum Bruäder Chlaus uf Sachslä.

Sin Vater Baptist isch im Jahr 1979 gstorbä und d’Muätter Marie isch ihm im Jahr 1988 gfolgt.

Dä Alpsummer 1996 isch für dä Dädi dä letscht gsi uf sinärä gliäbtä Furggälä. Är hed sich im 1997gi anärä Hüftoperation müässä unterziäh, wobi’s zu Komplikationä cho isch und a ihm än Nierä hed müässä entfärnt wärdä. Aschliessend hed är sich drü Wuchä im Spital z’Luzärn ufghaltä.

Das gsundheitlichä Ereignis hed däzuä gfüährt, dass är früähzitig pensioniärt wordä isch.

Nach äm Ruähstand hed dä Dädi gärä Fahrtä über Passstrassä unterno und Usflüg i d’Natur gnossä. Au uf Vehustelligä isch är gärä Gast gsi und hed diä usgstelltä Tier mit kännerhaftä Blick beguätachtet.

Sini Chind hend ihm sächs Enkelchind gschänkt, Patrice, Patricia, Chantal, Aurora, Talia und Jaro sowiä s’Urgrosschind Selina.

A allnä hed är grossi Freud gha und es isch für dä Dädi ä schöni Abwächslig gsi, wänd sie uf Bsuäch cho sind.

Im Jahr 2021 hend dä Dädi und s’Mami ihri goldig Hochziit dörfä fiirä. Sie hend äs feins Ässä mit dä Familiä gnossä.

I dä letschtä Jahr het ihm sini Gsundheit immer wieder z’schaffä gmacht und diä körperlichä Gebrächä hend zuä gnoh.

Am 8. April 2022 het dä Dädi müässä is Spital Einsiedlä igliefäret wärdä. Nach afänglicher Genesig het är än Rückfall erlittä, vo dem är sich nümä erholt het.

Am Samstigmorgä het är s’letschtä Mal «Dä Seppel isch ä bravä Maa» gsungä. Druf ab isch är am Sunntig i dä Nacht vom 24. April 2022 am 23.45 Uhr ruähig und friedlich igschlafä.

Mier sind sehr truurig über dä Tod vo üsäm liäbä Dädi, aber glich dankbar für vieli schöni Stundä und Erinnerigä. Mier wärdet dich niä vergässä und i üsäm Härz läbsch du witer.