«Ä gfährlichi Grippä»

Härzli wenig isch wiäs ämoul isch gsii / Schuld doudra isch Corona- Pandemie. / D’Lüüt hend afä hamschderä, egal was alles hät koschted / si hend der Ichaufswagä gfüllt und Bärgäwis WC-Papier poschdet.

Dass äs sou schlimm wird usächou, hät kei Mänsch dänkt / au ’s Derheimäbliibä vodä altä Lüüt hätsi schtarch igschränkt. / Ufs moul sind Gränzä zuä und fascht alli Flugzüg am Bodä / äs isch fertig mit Flüg buechä, mer cha sich nümmä verrodä.

Bi vilä Gschäfter sind d’Inahmä uf Null oder nümmä grouss / villicht bedüted das fürs eint oder ander sogar der Todesstouss. / Au z’Rom blibt der Petersplatz a der Oschterä und Pfingschtä lär. / Für diä Schtränggleubigä ussergwöhnlich und sicher schwär. Sicher mues au der Schport drunder liidä und uf Aläss verzichtä /oni Zueschauer schpilä, bringt kei Gäld, düendsi prichtä. / Vo der Corona-Pandemie sind au d’Reschtorant betroffä / vilicht hät der eint oder ander au Derheimä eis z’viil gsoffä.

Vourschriftä machä und vourschriibä sind undankbari Sachä / mit Sicherheit chammers einäwäg nüd allä richtig machä. / Corona- Pandemie hin oder här, äs isch jetzt eifach sou. / Mir hoffed und glaubed, äs cha ja nur wider besser chou.

Hermann Kälin (Bennau)