Urs Birchler-Scherer

NEKROLOGE

Liebä Dädi, du bisch am 7. März 1954 däheimä a dä Nordstrass z’Einsiedlä gebourä. Mit dim Mami und Dädi, dinä vier Brüäderä und dinerä einzigä Schwöscher Rita häsch du ä schöini und unbeschwärti Chindheit gha. Du bisch i dä Pfadi gsi, bisch gärn Ski gfahrä und häsch verzellt, dass ihr amig vom Friherräbärg bis Hei a Nordstrass händ chönä fahrä mit dä Ski.

Imenä Ufsatz, wo du i dä Schuäl gschriebä häsch, hämmer vernoh, dass du zerscht häsch wellä Lehrer oder Bürolist wärdä. Du häsch dich dänn aber doch für än Lehr als Fiinmechaniker bi dä Landis & Gyr z’Einsiedlä entschiedä. Nach dä Lehr bisch 5 Mönet uf England go Änglisch lehrä. Das isch im Jahr 1975 gsi. Äs Jahr druf, im 1976 häsch du nu d’Handelsschuäl in Rapperswil abgschlossä und bisch doch no Bürolist wordä. Im Jahr 1977 bisch zu dä IBM Schweiz AG, wo du bis zu dinerä Früähpensionierig vor 10 Jahr blibä bisch. Natürlich isch i denä vielä Jahr nu ganz viel passiert i dim Läbe, vo dem wemmer jetzt nuchli verzellä.

Im Jahr 1978 häsch du diä hübsch Iris us Badä nach dä Fasnacht i dä Fischerstubä kännäglert und ganzi 44 Jahr sind ihr zäme durs Läbe zogä.

Im Jahr 1982 händ ihr üches Liebesnäscht a dä Kronästrass 16 bezogä und 2 Jahr spöiter im 84gi händ ihr dä Schritt is Eheläbä gwagt. Nur äs Jahr spöiter isch dänn au scho üchi erscht Tochter Sandra uf d’Wält cho und im zweijahres Abstand zwei witeri Töchterä, Jacqueline und Janine. Au ä Hund hät bi dä Familiä Birchler immer däzuä ghört. Dä Rex, Dino, Kiry, Lilo und sit letscht Novämber s’Baby d’Nala. Nachdem d’Lilo i Himmel cho isch, häsch möglischt schnäll wieder ä Hund wellä und jetzt wüssemer au warum. Du häsch nüd wellä, dass s’Mami ganz allei isch, wänn du dä Lilo i Himmel folgsch … Mir chönd üs nu sehr guät a diä Ziit erinnerä, wo mer im Summer in Steibach sind go grillierä und mängisch mitem Böötli i Grüen Aff fürä gfahrä sind. Ab und zuä hämmer so-gar s’Zält am See ufgschlagä und händ det übernachtet. Dir häts im Steibach so guät gfallä, dass du ändi 90er-Jahr «s’Mökki » kauft häsch. Nach und nach häsches umbuut, verschönäred und erscht letschti Jahr vergrössered. Du häsch det vieli luschtigi und gmüetlichi Stundä mit Familiä und Fründä dörfä verbringä … au äs Kafi mit Schuss häts immer gäh.

Au schöni Erinnerigä chömmer mit dinerä Lidäschaft am Töfffahrä verbindä. D’Usflüg mitem Sitäwagä sind unvergässlich. Au ad Feriä z’Cavallino in Italiä dänked mir sehr gärn zrug. Mir chönd üs zwar nüd a alles erinnerä, aber zum Glück häsch immer gärn alles uf Fötäli und Film feschtghaltä.

Als Usglich zum strängä Familiäläbä bisch du flissig i Turnverein, ad Fasnacht und mängisch i d’Ritterbar. Regelmässig häsch au Larvä baschtlet und bisch als Sühudi im Dourf unterwägs gsi. Als Fasnächtler bisch du natürli äs aktivs Mitglied bi dä Goldmäuder gsi. Au d’Natur und Schwiizer Bärgwält häsch immer gliäbt und dini Friziit gärn bim Wanderä verbracht.

Dases dir nüd langwilig wird, häsch du im Jahr 2000 dä Schritt i Politik gmacht und bisch SVP-Kantonsrat wordä. Engangiert und motiviert häsch du dich für Einsiedlä igsetzt. Näbed dä Politik häsch du nu ä Hufä anderi Ämtli gha, wiä Präsidänt vo dä Flurgnossäschaft Kronenstrasse, Kassier vo dä Landkorporation Einsiedeln und Kassier im STV Einsiedle. Als Dank für din Isatz bisch du Ehremitglied wordä.

Du häsch immer alles guät organisiert und bisch sehr hilfsbereit gsi. I verschidnigä OK’s häsch du aktiv bi chlinärä und grössere Aläss mitghulfä wiä zum Bispiel am Schwingfest in Einsiedlä oder Kantonalturnfest.

S’Ämtli vom Gnossärat vo dä Gnossami Trachslau sowiä dä Gschäftsführerposchtä vom Skilift Brunni Haggenegg AG, wo du nach dinerä Früehpensionierig agnoh häsch, hät dir sehr viel Freud gmacht.

Fählä wirsch du au als «Dädi Urs» dinä zwei Grosschind Céline und Ciara. Das nüd nur wills bim Vier-gewinnt immer gwunnä händ, sondern wills dich ganz fescht gärn händ.

Diagnosä im August 2020 isch für alli en riisä Schock gsi. I dä letschtä anderthalb Jahr häsch du kämpft und ghofft, dass du stärker bisch als dini Chrankheit. Leider häsch du dä Kampf a dim 68. Geburtstag doch verlourä. Mir wirdet dich mit dinere humorvollä, luschtigä, pflichtbewusstä und hilsbereite Art niä vergässe. Mir glaubed fescht dra, dass mer üs wieder wirdet gseh. Dädi, mir sind mega stolz uf dich und vermissed dich sehr.