Best of Frau Antje 2001 bis 2024

2001

Mir chönd nüd singe, drum lömers lo sii. Im Gegesatz zu de Humirosis, gsend mir das wenigstens ii.

2003

D’Lehrer hend Stress und viel Arbet, sie dunkts nüd toll. Us dem Grund gönds uf Barrikade – und streiket voll. Mir findet – das sind au nu glatti Lüt, mached die jetz nu weniger als nüt?

2005

Einsiedlä isch wältbekannt und hätt letschti au nu nationali Berüemtheit erlangt. A dä Fyr für die gwählte Bezirksröt hätt me uf einisch vernou wartet nu mit fyrä, …es sind nu äs paar Zättlä vürächou.* 2010

Usem Einsidlerhof wend’s äs Top-Hotel buuä – ganz gstöürt schadä wurd’s nüd – nur hät mä jetzt scho lang nümejh ghöürt! Gueti Hotels z’Einsidlä? – das isch scho äs Ziitly verby. S’isch glaub vor der Französischä Revolution gsy.

2011

S’ganz Dorf isch dur der Hagel in Mittlydeschaft zogä wourdä, dä Gmürä Wisel macht sich zu rächt au wäg sinä Gebüh Sourgä. D’Hüser bim Bahnhof häts verbrätschet sie gsend dri s’isch en Grus, aber dä Wisel hät Glück gha s’Pöschtli und s’Isebähnli gsend nu wie vorhär us.

2012

Wänn är uftaucht isch es um alli Frauä gschej. Si fönd a träumä und schwärmä – ich ha’s sälber gsej. Es handlet sich dou nüd öppä um ä George Clooney. Nei – sondern umä Pater Aaron – dou stuuni.

2013 Einisch mejh Artä sind bedrouht, kei Ahnig, wou das no anä gouht. Anstatt Hampeisi, Fivalter und Chräh, wird’s einisch nur nu Ameisi, Schmätterling und Rabä gäh. Öppä ä sou all füüf bis sibä Jour. spiläts by üs s Wälttheater four, Aber sit 40 Jour lauft au nu äs anders Stuck, s’weiss jedä Gouf. Das grosse Theater um dä Einsiedlerhouf.

2015 Im Oschtä gout d’Sunnä uf, im Weschtä gout si under, und ds Einsidlä gout si konkurs – aber wie duräs Wunder hätt sie wieder offä – das lout üs fürs Schiff wieder hoffä. Bim FC törfeds uf dä Liibli kei Bierwärbig mejh mache. Im Gmürä Wisel vergout grad schier s’Lachä. Political Correctness isch i üserä Gsellschaft ä wichtigä Grad-mässer. Hey Wisel – mach doch Wärbig mit üs, mir gsejhnd ja schou schier us wie Bierfässer.

2017 Läbendi Toti – Zombies äs git sie doch, läbed i ihrer Welt, sind under üs, noch und noch, mit gläsigä Äugli laufets Ferngstüred umenand mit starrem Blick – ufs Händy i dä Hand.

2018

Zuekunft sig U’gwüss vo dä Einsidler Schanzä und dä Summer GP isch azellt und liet uf em Ranzä. Än usääglichi Gschicht im Eschbach hinnä – leider! Hett’mer siiner Zyt nur ufnä glost – ufä Dokter Zeno Schneider.

2019 Vu dä beschtä Sitä will sich Einsidlä presentierä. Und tuät viel Gäld in Gäschte Empfang investierä. Bim Bahnhof stout s’Empfangskommando dä ganz Tag parat. Bsoffä göürpssend begrüssends d’Gescht – nüd würklich adequat.

2020 Rächnä und schribä chönd üser Schüeler guät, Ä Studiä seit das, das macht üs Muät. Mir hend gnueg vo Pannä und Pleitä, die Schüler chönnted doch s’Spital Einsidlä leitä. Ä Zirkus ouni Ross und Elifantä, nur mit Glöön und Komödiantä. Stelled üch das einisch vour! Im Routhuus gaschtiert so einä s’ganzi Jour …

Theater wird i einigä Viertel ufgführt, Bennau, Euthal, Willerzäll – und das berührt, Au z’Einsidlä isch äs nüs Stuck dähei, S’«verecktä Theater um die hurä Bsetzistei». Chunsch vom Raucherlokal hei, muäsch vor dä Türä, alls Gwand abzieh und sofort id Wöschchuchi rührä. Mä isch’s sich nümä gwöhnt so z’stinkä und z’schwitzä. Aber chasch ja nüd i dä Underhose i’d Schmittä inä sitzä.

2022

D’ Analyse 2 Rabä sig under Verschluss, Sie sorgt im Bezriksrout schints für Verdruss. D’Löüsig isch glich wie bir Schanzä anä, mä sötti dä ganz Plunder spränge.

Ufem Buamt chrampfets wie verruckt. Es wird sich nüd vo dä Arbet druckt. All packed ah – sigs au nu so schwär, usser dä Chef – där spielt lieber Solitär.

2023 Dä Bezirksrout tuät s’Sportzäntrum nüd understützä. S’wär aber an intelligänti Investition und wür äm Sport nützä. Jä nu – mir verstönd dä Bezirksrout dou guät, mit Intelligänz und Sport hät er halt nüt am Huät.

2024 10 Millionä i dä Schwiiz sind z’viel Lüt. Nüi Strategie müend anä dou hilft nüt. Ä guäti Lösig hemmer us Einsidlä vernou. Im Spitoul hends scho mal vorsorglich Geburtäabteilig zuä tou. Frau – Maa – oder öppis zwüschädurä, s’sich egal, Du bisch, was Du fühlsch, es isch ganz banal, wo füehrt das nur anäh – mir tüends nüd verstouh, s’chnunt no sowiit und mir wirded als Mannä a d’Fasnacht gou. Immer weniger Restaurants häts – es isch ä Fakt, die stirbed fourzuä schier im Stundätakt, Mir akzeptiered nüd, dass das so isch, und chläbed üs us Protescht – a rundi Tisch!