Peter Pfyl-Marty

NEKROLOGE

Dä Peter isch am 3. August 1963 als Jüngstä vo viär Buäbä, churz nach sim Zwillingsbrüeder Kurt, uf d’Wält chou.

Zwilling hend mit ihrnä Elterä Trudy und Walti und dä zwei älterä Bruädärä Walter und Urs ä glücklichi Chindheit i dä Schindellegi gha. D’Primarschuäl hed dä Peter i dä Schindellegi bsuächt und d’Oberstufä z’Freienbach und z’Wollerau. Doch d’Schuäl isch für ihn eher näbät bi glaufä.

Ab dä drittä Klass isch är jedä Tag i Stampf apä i Gadä gu mälchä und allerlei gu hälfä. D’Liedäschaft zum Buur si, hed sich scho früäh abzeichnät, will tschuted hed dä Peter glaub niä. Im Lauf vo dä Zyt sind z’Stachis zu sim zweitä Däheimä wordä. Det hed dä Peter au afä Schwyzerörgäli spielä mitum Richi.

Sini Lehr hed dä Peter als Metallbuschlosser bi dä Firma Kälin Hiestand z’Pfäffikon im August 1979 agfangä.

Am 10.Oktober 1981 hed dä Peter ä schwärä Unfall gha, wo sis Läbä grundlegänd veränderät hed. Är isch Monate im Spital gsi, hed vieli Operationä müessä über sich la ergah, damit möglichst viel vo sinärä lingä Hand hed chönä erhaltä bliebä. Leider hed är dur dä Unfall na sini Lehr nid chönnä abschliässä. Dä Chopf hed dä Peter wägä dem aber nid i Sand gsteckt. Är hed glich nu witerhin chönä bi dä Lehrfirma go schaffä. Nachhär isch är dä zum Schattä Verel z’Schindellegi als Landmaschinämechaniker go schaffä. Det hed är dä Lagler Meiri kännä glernt, wo det i dä Lehr gsi isch, und zwüschet denä beidä isch ä läbeslangi Fründschaft entstandä. Au hed dä Peter det äs nüüs Hobby entdeckt. Dä Bührer Traktor! Aber da äs Hobby nid rändiert, hed dä Peter dä grad afä Gstrau und Heu transportierä und später dä aunu Silomais, Siloballä, Veh und Schaf. Vieli Täg isch dä Peter mit sim gliäbtä Traktor underwägs gsi und hed däbi viel erläbt. Au diä eint oder an-der Pannä heds gäh. Mängisch isch är au ohni Diesel oder ohni Luft gfahrä und äs isch au vorchou, dass nid diä ganz Fracht am Ziel ahchou isch. Dank sim handwärklichä Gschick hed dä Peter sis Gspann immer sälber gflickt und äs isch wiedr vorwärts gangä. Au für Trichlä hed dä Peter sich inträssiert, drum tüänd au hür im Summer, Veh wieder Trichlä lütä wo är gmacht hed.

1984 am Chilbisunntig isch dä Peter mitum Maihöfler au adä Einsidler Chilbi däbi gsi. Det hed är d’Renata wiedr gseh. Sie hed bi ihm duä so Idruck hinderla, dass är ihrä churzerhand nachägfahrä isch, hei is Ybrig. Am Peter si Kolleg hed dä i dä Schmalzgruäbä äs bizli z’spat brämsät und z’Auto uf dä Stägä parkiärt. Der Vorfall hed aber nur positivi Uswirkigä gha. Obwohls chli lang gangä isch, hend dä am 1. September 1990 Kilägloggä für d’Renata und dä Peter glütäd. Uf d’ Hochsigsreis sind diä Zwei ei Nacht is Stubaital, hend det Trichlä gholt und sind na uf äm Heiwäg nu uf nä grossi Chuäalp ob Mels. Lang isch au gangä, aber d’Freud dä umso grösser gsi, wo dä Peter dä Domini am 2. November 1997 zerstmal hed chönnä id Armä näh. Dä Peter isch ä stolzä Dädi gsi. Bsunders hed nä gfreut, wo dä Domini letscht Jahr d’Prüfig zum Buur mit so guätä Notä beständä hed. Dä Peter hed dörfä drüümal Götti si, adä Joli, am Martin und dä Sabrina.

10 Jahr, vo 1991 bis 2001, hed dä Peter und d’Renata im Hau zum Veh gluägt und vom 2002 bis 2011 sind si im Sattel z’Alp gsi. Mit viel Freud hed dä Peter und d’Renata 1995 im Nätsch sälber afä burnä. Äs isch nid immer alles so glaufä, wiä dä Peter sich das vorgstellt und gwünscht hed. Doch är hed immer vorwärts gluägt und alles däfür gäh, dass sini Familie äs schöns däheimä hed und är z’Burnä nid muäss ufgäh. Als Familie hend alli immer am glichä Strang zogä, anänand ghulfä und so öpis zämä erreicht, wo dä Peter richtig zfriedä gmacht hed. Im Euthal und im Gross hed d’Familie ihri Plätz gfundä. Dä Peter isch niä wiit i dä Wält umägreist, am liäbstä isch är däheimä gsi.

D’Vehzucht hed am Peter viel bedütet. So hed är sich 10 Jahr lang für dä Vehzuchtverein Hirsch-Unteriberg im Vorstand igsetzt. Bi dä 100-Jahr-Fiir vom Verein hed är d’Chuäh Romy mit dä höchstä Läbäsleistig gha, 2015 hed är als erstä im Verein ä Economie Star Uszeichnig für d’Chuäh Viona überchou und au d’Ranglistä vo dä Züchterprämiä hed är immer wiedr uf Platz 1 abgschlossä. Z’Einsiedlä isch är gärä ad Vehustellig mit sinä Tier und isch stolz druf gsi, wän är ä Chranz hed chönnä hei näh. Au isch är immer dankbar gsi und hed Freud gha, wänn i sim Gadä wieder äs gsunds Chaubäli uf d’Wält chou isch.

Idä Karwuchä am Zischtig hed dä Peter vom Doktr diä niderschmätterndi Diagnosä Spiesröhrächräbs überchou und mä hed gli gwüsst, dass äs kei Heilig meh wird gäh. Dä Peter hed sis Schicksal agnuh und isch dank-bar für diä Zit won är gha hed. Es hed ihm ä gwüssi Ruäh und Freud gäh, will er weiss, dass es mit sim gliäbtä Burnä däheimä cha witergah. Nach füf Wuchä Spitalufenthalt isch är am Sunntig, 14. Mai 2023 im Spital Einsiedlä friedlich igschlafä.

In Liebi und Dankbarkeit: Dini Familie – Dädi mir vermissät dich