Marie Fuchs-Kälin, Willerzell

Do, 11. Jul. 2013

 

D'Freud muäss grouss gsi si bi dr Marie Kälin-Birchler und em Klemens Kälin. Nach viär Buäblä isch am 4. Dezämber 1930 s'erschtä Meitäli im Doppelstei uf d'Wält chou. «S'Stachi Marieli» hät mä ihrä gseit – au duä nu, wo sie ä groussi, stämmigi Frau gsi isch. 

Wiä uusicher s Läbä cha sii, hät sie und ihri Familiä schou ganz früäh müässä erfahrä. Im Juni 1932 isch ihri Muätter kurz nach dr Geburt vo ihrär chlinä Schwöster Margrit gschtourbä. S'Marieli isch duä erscht anderhalbjährig gsi. Und trotzdem oder viellicht grad drum, hät sie das tragische Ereignis schtarch prägt und bis as Läbesänd begleitet. So hät das strouhblondä Meitli schou früäh müässä leihrä, sälbschtändig z'sii und Arbedä i Huus und Hof übernäh. Sie isch ä uusgezeichniti Schüäleri gsi, und mir glaubed, dass sie gar nüd so ugärä i d'Schuel isch. Nach dr obligatorischä Schuelziit hät sie z'Einsiedlä d'Kochschuel bsuecht. Das Gleihrte hät sie guät chönnä bruchä, will d'Mannä im Doppelstei viel Wärt uf warmi Mahlziitä gleit händ. 

Im Jour 1957 hät sie dä ä Schtell als Serviertochter z'Thalwil agnou. Dä hät ihres Läbä wider ä anderi Wändig gnou. Im Dezember 1959  isch sie Muetter vo dr Bernadette worde. Das isch für sie nüd ä eifachi Situation gsi, will sie sich entschiedä hät, ä ledigi Muetter z'si. Ihrä isch schou bewusst gsi, was das duäzumoul bedütet hät. Aber wiä so mängisch im Läbä sinds genau diä Entscheidigä, wo sichs louhnt, Schtärchi z'zeige und gäge alli Widerständ a z'kämpfä. Und so isch im Doppelstei wider äs chliises blonds Meiteli ufgwachsä, wo ihrä, ihrnä zwei ledigä Bruäderä  und ihrem Vater viel Freud gschänkt und Läbä is Huus broucht hät. Im Jour 1961 isch dr Vater Klemens  gschtourbä und obwohl alli scho älter gsi sind, hät jedä müässä ä eignigä Wäg suäche. Ihrä Wäg isch ä eigni Familiä gsi. D'Bernadette hät sich g'wunderät, warum sie jetzt plötzlich amäne Sunntig muäss i d'Wiistanne gou wandärä … S'Rätsel hät sich dä glii einisch ufglöust: Det isch nämli dr «Schlegeli Fredel» z'Alp gsi und so händ diä zwei im Oktober 1965 dr Bund fürs Läbä gschlossä. Im Juli 1966 isch d'Marlen uf d'Wält chou und im März 1970 isch dänn d'Familiä mit äm Fredi komplett gsi.

Im 1968 sind mir dä nach churzä Abstächer z'Einsiedlä und im Tschuppmoos is Rickithal hindärä zogä. S'Hus isch alt gsi und scho längeri Ziit unbewohnt. Dr verwilderät Gartä isch under ihrnä Händ zumänä Gmües- und Bluämäparadiesli wourdä. Sie hät zu Farb und Pinsel griffä, Novilon verleit und so versuecht, alles ä chli gmüätlicher zmachä. I Heimarbet hät sie Gobelins gstickt und mit ihrer Strickmaschinä Strumpfhosä glismet. Dr Dädi hät i dr Zwüscheziit s'Älplärä ufgä und ä Vollziitstell gha. Für ihn isch s'Burnä näbädra so wichtig gsi, dass s'Mami das tatchräftig mittreit hät. Zwei Chüä, zwei Rinder, Hüender, ä Suu, Pachtland im Baaholz und im Burket, so isch viel Arbet a ihrä hangä bliibä. S'Mami isch dä nu am Samstig und Sunntig z'erscht is Coop-Restaurant Franziskaner und nachhär i Sunnä-Kiosk gou schaffä. Ihrä hät dä Kontakt zu dr Lüüt gfallä und äs hät Abwächslig und Verdiänscht broucht. Aber alles mitenand isch au ä groussi Usäforderig gsi. Dä hät dä au dr Dädi iigseh, dass s'Burnä es sou eifach kei Zuäkunft hät. Fürs Mami isch das ä groussi Erliächterig gsi und äs isch Ziit frii wourdä für vieläs, wo sie eifach us luuter Freud a dr Sach hät chönnä mache. Sie hät immer gärä g’läsä, am Gärtnerä hät sie Freud gha und Handarbeitä isch ä läbeslangi Liidäschaft bliibä. 

Im 1977 isch sie dä s'erschte Mal Grosi wourdä. Mit dr Sandra isch üsäri Familie wieder um äs blonds Meitäli grösser wourdä. 1990 isch dr Ramon uf d'Wält chou und äs isch nüd lang gangä, hät är dr Weg zum Grosi sälber under d'Füess gnou. 1992 hät ihn dä au glii dr Manuel begleitet. Im 1996 isch mit dr Melanie und im 1998  mit dr Nadine wider jungs Läbä is Huus chou. S'Grosi hät Freud gha, wänn diä beidä sie im oberä Stock sind chou bsuächä, dobä Ufzgi gmacht oder mit ihrä «Frau Iseli» gluegt händ. Mit ihnä hät sie au d'Freud ä dr Tiär teilt. 

Wo dr Dädi pensioniert wordä isch, isch är wieder z'Alp und s'Mami hät diä Summermönet chönne gschtaltä, wiäs für sie passt hät. Sie isch uf Züri zum Coiffeur, hät sich det lou verwöhne und hät grad nu alli möglichä Gschäft abklapperet. Sie isch spontan mit em Zug dur diä ganzi Schwiiz und is aagränzendi Uusland greist. Mit 70gi hät sie sich entschlossä, sie welli einisch im Läbä gou flüügä. So hät sie für drü Täg Berlin buäched. Wänn dr Alpsummer verbii gsi isch, hät mä sie dä wieder öppä chönnä zämä aträffe. S'Mami als Chauffeur und dr Dädi als Biifahrer händs ihri Uusflüg zu Kaffee und Gipfeli is Mythä- oder is Seedamm-Center gmacht.

Doch dä isch bim Dädi im 2007 Kräbs-Diagnosä chou. Wo's dä offäsichtlich wourdä isch, dass är nummä lang z'läbä hät, isch es sie gsi, wo rund um d'Uhr umä gsi isch und s'möglich gmacht hät, dass är dr heimä hät chönnä schtärbä. Nach 42 gmeinsamä Jour mit allnä Freudä und Sorgä hät sie ihn
schtarch vermisst. Ihrä eignigi Gsundheitszuästand hät sich für und für verschlächteret – d'Spitalufenthält sind immer hüüfiger und i chürzärä Abschtänd nötig gsi. 

Im Mai 2011 hät sie dä nu dörfä äs freudigs Ereignis erläbä. Ihres erschtä Urgrousschind, d'Lia isch gsund und munter uf d'Wält chou und numal hät sie dörfe zwei Läbäsjour vum änä chlinä blondä Meitäli miterläbä.

Am 22. Mai 2013 isch sie vum Arzt is Spital iigwisä wourdä. Aber es isch dä scho glii klar gsi, dass mä ihrä nüd cha hälfä und sie mit denä Symptom nümmä hei is Rickithal cha. Nach zwei schwärä Wuchä hät sie am 5. Juni im Spital z'Einsiedlä, grad wo dr Fredi bi ihrä gsi isch, dörfä ihres ewige Däheimä und dr verdienti Friedä gfindä! 

I grousser Dankbarkeit: Dini Familiä  


Immobilien

Stellen

Kommende Events

Andere Angebote