Lydia Kälin (Erlä Greusi)

Do, 23. Mai. 2013

 

Üseri Mueter isch am 21. Juli 1922 als zweits vo sächs Chind i der Erlä im Willerzell uf d'Wält chou. Bereits i ihrem sächstä Läbensjour isch ihri Muotter gstorbä. Da sind diä dri Büeblä und dri Maitlä mit ihrem Vater und der blindä Grousmueter älei dou gstandä. Sou häts sie dän au schou gli überall müessä mithälfä wous nur mögli gsi isch. Ihri sibä Jour Schuol hät sie im Willerzäll absolviert, wovon diä sibit Klass bim langjährigä «Schuolmeister» Josef Chäli, wo vili vo üs au nu d Schuolbank druckt hend.

Nou der Schulzit hät sie müessä derheimä hälfä burnä und hushaltä und zwüsched durä bi ihrer Tantä im Hirschä im Euthal müessä gou schaffä. Ihri jüngst Schwöster (d Adelina) hät mir verzelt, dass sie i derä Zyt (obwohl nur füf Jour älter) praktisch ihri Mueter gsi isch. I derä Zyt hät sie miterläbt, wie dr Sihlsee gstaued, und ano 1939 i der Erlä dr elektrisch Strom installiert wordä isch. Mit 20gi hät sie üserä Vater ghüroutä, und mit ihm uf zwänzg Jouhr verteilt nün Chind gha. Die zwei Maitlä und sibä Büeblä hend für jedi Mängi Arbeit und wenig Schlouf gsourgt. Mir sind alli kei Duräschläufer gsi. Und sou hät sie ungefähr 20 Jour jedi Nacht öpä zweimal müessä ufstou! 

Wou die Ältistä grösser gsi, und hin und wider i Usgang sind, hät sie ä Frau gfrougt: chasch du dä schloufe, wänn diä nüd derheimä sind? Dou hät sie gmeint: Wän ich um die wet Angst ha, müöst ich grad numal 20 Jour nüd is Bett. Als Buräfrau mit soviel Chind isch sie jou nüd grad uf Rousä betted gsi. Für üs hät sie aber schier alles möglich gmacht. Wän z.B. z Einsidlä im Kino der Heidifilm glauffä isch, hät sie irgend wohär dä Füfliber uftribä wos kostet hät, so dass mir z'Drittä hend chönnä gou luegä, und das erstnu mit em Postauto! Hüt dänk ich, sie hät !üs! probiert uf Rosä zbette, und sie isch uf dä stupfigä Stielä glägä.

Am zweitä Mai 1972 isch der Vater gstourbä, und äs Jour spöuter hät sie chönä s Hus im Rickätal, wou der Vater ufgwachsä isch, übernä, und isch mit dä jüngstä drü Chind det izogä.

Sie isch aber der Mittelpunkt vo üserer Familiä blibä, und mir sind immer alli gärä zu ihrä gangä, um ächli gou redä, und s Nüschti vo der immer grösser wärdändä Verwandschaft z erfahrä. Ich ha i mim ganzä Läbä nie vo ihre ghört: «Ich ha kei Zyt», immer isch sie für üs dou gsi. Öb einä vo üs ä Gaumeri, ä guetä Rout oder äs paar wulig Sockä brucht hät.

S Erlä Greusi hät nie nei gseit, und hät üs immer chönnä witerhälfä. Mit Lidäschaft hät sie jedä Samstig Eierzöpf bachä und häts grad aunu sälber mit em Velo eim vo üs is Hus broucht. Näbebi isch sie vili Jour als Milchwägeri underwägs gsi, im Summer bis i diä umligendä Alpä ufä. 

I dä letschtä zä Jourä hät ihri Sehchraft immer mej abgnou. Darum hät sie sich entschlossä is Altersheim Langrüti zgou. «Ich gou solang ich nu sälber cha entscheidä», hät sie gmeint! Det hät sie sich au wohl gfühlt. Nach emä Hirnschlag isch sie leider eisitig glähmt gsi. I derä für sie schwärä Zyt isch ihrä d Adelina ä groussi Hilf gsi. S Tanti hät mit ihrnä Bsuech und chlinä Handreichigä, ihrä die langä Täg im Bett ä chli agnämer gmacht. Und sou isch wieder öppis zrugg chou zu ihrä, wou sie ihrere chlinä Schwöster vor über 70 Jouhrä gäh hät. Nämli die Zyt und Anerchänig, wou sie damals investiert hät.

Erlä Greusi mir danked Dir, für alles wou Du für üs im Läbä gmacht häsch.           Dini Familiä


Immobilien

Stellen

Kommende Events

Andere Angebote