Viktor Kälin

Üsä Brüeder Viktor isch am 8. August 1951 im Birchli uf d’Wält chou. Nachem Franz, Wisi, Werner und Meiri isch är dä füft Bueb gsi vo üsem Vater Franz und üserä Mueter Hermine. Sechs Jour spöiter isch nu d’Rosmarie derzue chou. Sini erschtä Läbensund Schueljahr häd är im Birchli verbrungä, bis üsä Vater im Dezember 1960 vom Chlouschter d’Rossmatt als Wärchmeister häd chönnä übernä. Jetz häd fürä Vikter ä anderi Zyt agfangä. Näbedem längärä Schuelwäg häd är au dä Heimä müessä hälfä, aber das häd im nüd usgmacht, är häd Freud gha dra.

Nou dr Schuel isch är zu dä Familie Portmann i Tristel go schaffä. Wo dä Franz bi dä Binzner isch go holzä, isch dä Vikter wieder heichou und häd mit äm Vater und em Wisi zämä gschaffed. Anä 1974 häd dr Vikter und dr Wisi vom duozmaligä Statthalter Pater Frowin chönnä d’Rossmatt pachtä. Sie hend müessä ä nüä Traktor chauffä und allerlei Maschinä sind veralted gsi. Leider isch üsä Wisi 1977 mit nur 33 Jour gstourbä. Dr Meiri isch dä igstigä und zämä hend die zwei däheimä buurned.

Üsä Vater häd so lang är häd mögä ghulfä, bis är 1991 gstorbä isch. Näbäbi häd dä Vikter uf dä Lochweid zu dä Rinder gluegt und im Winter isch är go holzä. Dr Vikter isch ä gselligä Mänsch gsi. Am Samstigabed häd dr Usgang mit Kollegä müessä si. Au am Sunntig morgä isch är z’Chilä, wänn halt dä Pfarrer ä sou lang prediged häd, bis äs Durscht gä häd, isch halt scho öppä passiert, dass dä Däheimä nur nu «Ofätüirli-Choscht» gä häd.

1992 häd dä Vikter chönnä vo dä Gnousami Trachslau d’Alp Buechä als Älpler übernä. Das sind für ihn die schöinschtä Jour i sim Läbä wourdä. Det obä bi sim Vej und sinä Geissä isch är glücklich und därheimä gsi. Nie vergässä wirded mir die immer am 15. August durägfüertä Buechäfäscht mitem fiirlichä Alpgottesdienst.

1993 häd är serscht mal müessä d’Hüft opperierä, das isch aber problemlos verlaufä. 2007 isch üsi Mueter gstorbä und dä Vikter hed sälber müessä hushaltä. Am 1. Jänner 2008 häd dä Vikter und dä Meiri d’Rossmatt im Meiri sim älterä Sohn Roli übergä. Sini Geissäzucht häd är aber imnä nüä Geissgadä chönnä witerfüerä. lm Summer 2011 isch är bim Heuä schwär verunglückt. Är häd die scho opperiert Hüft brochä. Bi dä Opperation häds Problem gä und är häd mitem Heli uf Züri müessä. D’Heilig häd ewig lang dured, so das är 2012 nüd häd chönnä uf d’Buechä. 2013 isch är wieder z’Alp aber mit sinrä agschlagnä Gsundheit isches der letscht Alpsummer gsi. Mit schwärem Härzä häd är nach 40 Jour als Älpler müessä ufhörä.

Nach sinrä Zyt als Älpler hend diä schöinä Usflüg mitem Bus vom Noldi und dä Marlis am Vikter vill Freud gmacht und hend üs zämä a mängs schöins Ort higfüert. Im Oktober 2018 isch är is Alpel zügled. Bi sim Husmeister Remo, dä Familie vo dä Beatrice und vom Andy, häd är sich sehr wohl gfühlt und isch immer dankbar gsi für alles.

Am 25. Juni häd är midemä schwärä lnfäkt is Spital Einsiedlä müessä und spöiter is Spital Balgrist. Nach dem au nu sini Nierä verseit hend, häd sis chrankä Härz diä Strapatzä nümmä usghaltä. Am 6. Juli am Geburtstag vom Vater isch är gstorbä.

Liebä Vikter du läbsch i üsnä Härzä witer.

Dini Gschwüschterti