Elisabeth Marty-Fässler

NEKROLOGE

Du bisch am 16. April 1930 im Gütsch am Sunnebärg uf d Wält cho. Als Dritteltischdi vo gsamthaft acht Kind hesch du ufem Burehof vo üchne Eltere tatkräftig mitghulfe. Ihr sind i sehr eifache Verhältnis gross worde.

I junge Jahre bisch du wäg vo dihei und hesch als Hushaltshilf i verschiednige Familene dis Besti gä. Als Hushälterin im Schlund hesch du de David kännä und liebe glernt. Churzi Ziet spöter hend ihr zwei ghürate und zämme s’Heime ide Adelmatt ide Stude übernu und bewirtschaftet. Nid nur das Heime isch vo dir undem David bewirtschaftet worde, sondern spöter au s’Restaurant Rosa uf de Waag im Ybrig.

D’Rosa hedmer wiet ume kännt und das vor allem wäg dinere usgezeichnete Kuchi und de urchige Unterhaltig. Du bisch scho due die gebornigi Gastgeberin gsi.

Dini Filmkamera hesch du immer griffbereit gha. Nid nur de Betrieb bi üch i de Rose und d’Buziet vom Hoch-Ybrig hesch du dokumentiert, sondern au vieli scheuni Momänt so für immer festghalte.

Afangs 70er-Jahr hesch du midem David s Frideggli buä, wo üches nüä Diheime worde isch. Du bisch immer ä gselligi und freudigi Frau gsi. Du hesch gärn Bekannti und Verwandti iglade und mit grosser Liedeschaft verköstiget. Bi diär isch nie öpert z’kurz chou. Mir möget üs no guet a din Kristbaum erinnere. De isch für üs Kind duezumal immer es riese Highlight gsi. Nid wäg de scheune Tannä sondern wills meistens meh Schoggälädli als Kugle dra gha hed.

Ä grossi Liedeschaft isch din Husgarte und de Umschwung ums Frideggli gsi. All die schöne Blueme und das viele Gmües wo du all Jahr mit grossem Fliess ufzogä und pflanzt hesch. Ich glaube da isch no mängi Husfrau niedisch uf din Gartä gsi.

Wenn du nid bi dir im Husgarte gsi bisch, bisch du bim David im Baumeli gu hälfe.

2002 hesch du vom David müesse Abschied näh. Nach äs paarJahrheschdudichwehmüetig dezue entschlosse, s’Frideggli ufzgäh und bisch it Sonnmatt 13 ine chlini Wohnig is Hus vom Susi zoge.

Au det sind Bekannti und Verwandti immer härzlich willkomme gsi. Mir hend schöni und lustigi Stunde dörfe bi dir verbringe. Du hesch immer gärn glachet und es Sprüchli uf Lager gha.

Din starche Glaube an Herrgott hät dir nach mängem Schicksalsschlag immer wieder die nötig Kraft geh, vorwärts z’luege.

Nadisna hend dini körperliche Kreft nahglah und du hesch dich entschiede, im März 2019 is Alters- und Pflegheim Ybrig z’gah.

Trotz dienere positive und fröhliche Läbesistellig bisch du immer schwächer worde und hesch jetzt nüme möge kämpfe. Am Ziestig, 16. Juni, bisch du für immer vo üs gange.

A dere Stell wett ich dir, im Name vo all diene Liebste, vo ganzem Härze danke säge. Du hesch üses Läbe i jedere Hisicht beriecheret. Mir wärdet dich und dini härzlich Art, aber au dis Lache für immer in Erinnerig phalte und du wirsch immer e Platz i üsne Härze ha. Liebi Lisä … auf Wiedersehn … Dini Verwandtä